ESPERIENTZIAK

Elikagaiak Eskuratzeko Programa (PAA) 2003an sortu zen, eta Gobernu Federalak abian jarritako ekintza bat da, Brasilen gosearen eta pobreziaren kontrako borrokan laguntzeko eta, aldi berean, familia-nekazaritza indartzeko. Horretarako, familia-nekazariei edo haien erakundeei produktuak zuzenean erostea ahalbidetzen duten merkaturatze-mekanismoak erabiltzen ditu programak, ekoizpenari balioa erantsiko dioten prozesuak bultzatuz.

Nola gauzatzen da?

Elikagaietako batzuk gobernuak erosten dizkie zuzenean nekazaritza erreformako asentamenduetako nekazariei, indigenen komunitateei eta gainerako herri eta komunitate tradizionalei, stock estrategikoak sortzeko eta urrakortasun handiena duten biztanleei banatzeko.

Donaziora bideratzen diren produktuak gizarte eta urgazpeneko sareko erakundeei, herritarrentzako jantokiei, elikagai-bankuei, elikagaien sukaldeei eta gobernu federalak banatzen dituen elikagaien otzaretarako eskaintzen dira.

Elikagaien beste zati bat familia-nekazaritzako erakundeek eurek erosten dituzte stock propioak edukitzeko. Horrela, posible da unerik egokienean merkaturatzea, azoka publiko edo pribatuetan, eta produktuei balio handiagoa ematea ahalbidetzen da.

Erosketa lizitaziorik gabe egin daiteke. Nekazari bakoitzak urteko muga bat dauka, eta prezioek ezin dute tokiko merkatuetako prezioak baino garestiagoak izan.

Nork hartzen du parte programan: familia-nekazariek, nekazaritzako erreformako asentamenduetan daudenek, indigenen komunitateek eta gainerako herri eta komunitate tradizionalek edo Pronafen Gaitasun Adierazpena duten landa-eremuko familia-proiektuek.

Nork gauzatzen du programa: PAA Familia-nekazaritza eta Nekazaritza Garapeneko Idazkaritza Nagusiaren (SEAD) eta Gizarte eta Nekazaritza Garapeneko Ministerioaren baliabideekin gauzatzen da, estatuen, udalerrien eta Hornikuntzarako Enpresa Nazionalaren (CONAB, portugesezko siglengatik) laguntzarekin.

Programa hori arriskuan jarri dute Bolsonaroren gobernuaren politikek, horren lehentasuna agronegozioari mesede egitea baita.