ESPERIENTZIAK

Eibarko Andretxea formazio eta informazio zentro bat da, eta emakumeen eta gizonen eguneroko bizimoduan berdintasun-harremanak, eta ez botere-harremanak, gailentzea du xede.

Udaleko Berdintasun Zerbitzuaren baliabide bat da, eta Eibarren, berdintasunaren eta tratu egokien alde lan egiteko helburuaz bat egiten duen herritar ororentzako zabalik dago. Topagunea ere bada, kultura-aniztasunerako eta emakumeak ahalduntzeko, elkartegintza eta herritarren parte-hartzea lantzeko lekua ere bai.

Hainbat zerbitzu eskaintzen ditu:

• Berdintasun zerbitzuak eta hari loturiko beste erakunde batzuek -Emakumearen Mahaia, kasu- antolatzen dituzten jarduerei, kanpainei, programei, erakusketei, hitzaldiei eta ikastaroei buruzko informazioa ematea.
• Hainbat gairi buruz (indarkeria, sexu- eta genero-aniztasuna, ahalduntzea, kultura…) erabilgarri dauden baliabide eta eskubideen gaineko orientazioa eta aholkularitza ematea.

• Formazioa:
  • Jabetze Eskolako ikastaro eta tailerretan emakumeek euren bizitzaren jabe izan daitezen tresnak eskaintzen dituzte, pertsona nahiz kolektibo gisa indartzeko tresnak, elkarrekin ikasteko eta parte-hartze sozial eta politikoa motibatzeko, eta errealitatea genero-ikuspegitik aztertzeko tresnak.
  • Jabetze Eskolako Ahalduntzeko espazioetan arlo pertsonala nahiz kolektiboa lan daiteke, ahalduntzea talde-prozesu gisa. Hainbat beharrizani erantzuteko eta lantzeko espazioak prestatuko dira. Ikastaro honetan gauzatuko diren espazioak honako hauek dira: Tratu onak sustatzeko lotura afektiboak eta Geure burua maitatzen ikasten.
  • Emakumeen elkarteek eta/edo berdintasunaren aldeko elkarteek eskaintzen dituzten ikastaro eta jarduerak.
  • Hainbat gairi buruzko hitzaldi eta jarduerak.

• Sentsibilizazio kanpainak eta programak:
  • Martxoaren 8ko kanpaina, Emakumeen Nazioarteko Eguna: berdintasunaren aldeko ibilaldiak, herritarren elkarretaratzeak, erakusketak, kartel-lehiaketak…
  • Maiatzaren 17a, Lesfobiaren eta Transfobiaren aurkako Nazioarteko Eguna eta ekainaren 28a, LGTBI Eskubideen Aldeko Nazioarteko Eguna: informazio-mahaiak, dokumentalak, LGTBI bandera jasotzea, hitzaldiak…
  • Azaroaren 25eko kanpaina, Indarkeria Matxisten kontrako Nazioarteko Eguna: herritarren elkarretaratzeak, hitzaldi irekiak, kontzientziatzeko jarduerak…
  • Gazteei zuzenduriko Beldur Barik programa, indarkeria sexista prebenitzeko eta errespetuan, tratu onean eta berdintasunean oinarrituriko harremanak bultzatzeko.

• Baliabideak:
  • Berdintasun eta generoan espezializaturiko liburutegia, aholkulariarekin.
  • Hezkidetza lantzeko materiala.
  • Sexu- eta Genero-aniztasunari buruzko materiala.

• Aisia:
  • Emakumeen Paseoak, hileko azkeneko ostegunean, goizez; Eibar eta inguruetatik, bi orduko iraupena.